Chucha pa srulopa waminchipelo kuikon chi atrapik wan chi puray trapikwan.
Kalo puntrap kuy kalo komontrap ko muy. Wam kontrap kuy komontrap kuy korik pala paip korik isup mikmatap chish isup paip wamintiyan.
Chuchape mana nak kon isum kaik wan isua. Mutam moskay srulowam: srol icha trantra chip pun.
Chuchape mutam moskawan srol icha trantra chip pe. Nun chull kopito llirap unam kaik kotancha; kan poñik uno nitrap intrapcha paya kusrop pun.
Mutap moskay srol icha tranoppe: mik kop, tomwan kop, trikwan kop kay pilli polom mullchap koncha srona trumar.
Eshkap waminchip wapene.
Nope nuy kaluyu puy mormo lotappe o... o... m... m... ¿trenchauta?, ¿trenkontrauta?, ¿trepuraitrauta?, chip lotap wan.
|
Trenchip lota wawape: tru yemtouy yainkon srol icha tranapik way wam wan wento pasra. Nun chull kopito kanapene nuy isuikwan puntrap yan.
Puape poñik unan nemorene: poñik unope ayay cha yau elo mora amtrumne trashipene: yauelope trento nikap pum nuk kopene: isupto llirap melapela kuape; ka neto tsik tamara truwa wetruwa. Nuy unamik oyanto kuitarru truyuto pishirana tratrikon.
Tru yemtouy mutamoskay marik wapene poñik uno puar kuik komota: ka pachito moro waminchip kuy morop wapene pon kato ichip wantrop kuy morowawape: chi puraip kermaptouy isup kualmawape.
Lotsis pato kutra yap tra luto tokaik kuape trirrop mekuawa: puraintrap ipene trupa polom kutropen pasramisra ashenpa: nosta kuaroppa tap ashene. Na srol icha tranik unope; kay polom kutrap tsuik nuk ashipto. |
|
Trek tsuik ashape srulope isup kotromisrape; no wam morosraikwan korosraik wan; wentopasra poto puna pella yaik nuk oyek purayaik tamap nu isup kotromisran. |
|
| Wento kualomera korik puram montray trek korotram nepun maya urek srelan.
ikwan waminchipik: Manuel J. Tunubala H.
|
|