Metrap kampásrompe, srulo wam puaik waminchipik kuin kua inchá; kan srulo, uno kuape, usri isik kunkarup, awela pasram kusrennop, mutap usri wasr srankarup, korosrop kopen nope mormoto, eshekto wap, torpato kip, lotso kutromup inchipik kon tan.
Usrimpe, isik wan shushchik kua, mai mayá, lusik tapchik pasra lusá unamik kon chip, eshkap, kusrennop, korosrop wamne, mope pulú kien kiemallmik wapik kon tan, inchape chitoká purosrúa unamik chi kaik kosaktik kopik kon tan.
Yanto, nurap srusro misrop ipen, kasherantrápelo wam puro orop, mentopen, isua mora, kasheramik nepuntrap kui morá, isik kup mentapik kon, shushchik, tápchik nui usri, nui awelá mutap usri eshkaikwan isuá.
Trumneto, wam puppe, moskaloto nomto chap wamincha, chap utá muchá, patruyuto kasheranamik chap tamarop waminchip kon chipelo kon tan.
Trek wuam morape, srulapo kasheramik matrak kon chitan cha, isik wan mallá kup mentappe, weruk, weruk, weruk kuaká, tru shush, tapchik polpasrimpalato, topoyu kutrémpe arú, arú, alak, alak waip lusik pasrop mentapik kontan. Malla némartrap, peto lusá kasheramik isupto.
Trek matrak kuik, malla waip, lusik pasrop pasrontsik kieta wapene, kato sroik wam nikaik puppe, paánchik ne núrampa koncha, tsontáto kasheramtrap cha ka munik rantrei tan chip pupen.
Trúpe trek yana palaik kopene, srulo unope, nui kasheram lusik wan, tsontáto, kato shushchik isikwan kup, tapchik waip, kashchik nemaropik kon, kasheram lusik wam.
Yanto kasheram kualom nepuppene lusappe, no maik marik wan tamará lusá, kasherantrap atruá wapik kon tan. Unopato, nui usri, nui awelá, mutap usri korosrop, kusronnop, waminchip kopen mormik kua, korik misrá pureipik kon tan.
|
Incha wei, moikatik oyá nui srulo kalikpe, pintro mentá shushchik, kashchik topotakpe arunku kon chipelo kon.
Urekpato kusrentrap inchen momuipe, kolirawa oyek korik misrop pureip pontrámik kopik kuinkon tan.
ikwan waminchipik: Misael Aranda y Bárbara Muelas
|